लामो समयदेखि चर्चाकाे विषय बनेको मन्त्रिपरिषद पुनर्गठन आज : को-को हट्दै, को-को आउँदै ?

प्रधानमन्त्री केपी शर्मा ओलीले मन्त्रिपरिषद् हेरफेरको तयारी गर्नुभएको छ । स्रोतकाे अनुसार प्रधानमन्त्री केपी शर्मा ओलीले आजै मन्त्रिपरिषद पुनर्गठन गर्ने तयारी गर्नु भएको छ ।

प्रधानमन्त्री निवास बालुवाटारमा मङ्गलबार साँझ बसेको मन्त्रिपरिषद् बैठकमा प्रधानमन्त्री ओलीले तत्कालै मन्त्रिपरिषद् हेरफेर हुने स्पष्ट सङ्केत गर्नुभएकाे थियाे । स्रताेकाे अनुसार मंगलबार नै प्रधानमन्त्री ओलीले मन्त्रिपरिषद पुनर्गठन गर्न लागेको मन्त्रीहरूलाई औपचारिक जानकारी दिइसक्नुभएको छ ।

बैठकमा प्रधानमन्त्री ओलीले आज मन्त्रिहरुलाई सार्वजनिक कार्यक्रममा नजान समेत आग्रह गरिसक्नु भएको स्रोतले जनाएकाे छ । ‘मैले केही सोचिरहेको छु, भोली केही न केही निर्णय लिन्छु होला, सहकार्यका लागि तपाईंहरु सबैलाई धन्यवाद’ प्रधामन्त्री ओलीको भनाई उद्धृत गर्दै स्रोतले भन्यो

मन्त्रिपरिषद पुनर्गठनबारे लामो समयदेखि चर्चा चल्दै आएको छ । सोमबार नै मन्त्रिपरिषद् पुनर्गठन गर्ने तयारी थियो । तर प्रधानमन्त्री ओली र अर्का अध्यक्ष पुष्पकमल दाहाल प्रचण्डबीच भएको छलफलमा सहमति नजुट्दा पुनगर्ठन रोकिएको थियो ।

स्रोतकाे अनुसार हालको मन्त्रिपरिषदमा रहेका पाँचदेखि आठ जनासम्मलाई हटाएर नयाँ नेतालाई अवसर दिने तयारी भइरहेको छ। स्रोतकाे अनुसार दुई अध्यक्षबीच सहमति जुटेमा दिउँसो २ बजे अगाडि मन्त्रिपरिषद् पुनर्गठन हुनेछ ।

बुधबार विहान सत्तारूढ दल नेपाल कम्युनिष्ट पार्टी (नेकपा)ले सचिवालय बैठक समेत बोलाइएको छ । प्रधानमन्त्री निवास बालुवाटारमा बिहान ९ बजे बस्ने भएको नेकपा कार्यालय सचिव ईश्वरी रिजालले जानकारी दिनुभयो ।

दुई तिहाइ बहुमतको सरकार हुँदासमेत मन्त्रीको काम सन्तोषजनक नदेखिएकाले मन्त्रिमण्डल हेरफेर गर्ने तयारी प्रधानमन्त्रीले गरेको स्रोतले जनाएको छ ।

प्रधानमन्त्री ओली निकटका उच्च स्रोतले दिएको जानकारीअनुसार कृषिमन्त्री चक्रपाणी खनाल, उद्योगमन्त्री मातृका यादव, महिला महिला, बालबालिका तथा जेष्ठ नागरिकमन्त्री थममाया थापा र भौतिकमन्त्री रघुवीर महासेठ, श्रममन्त्री गोकर्ण विष्ट, खेलकुदमन्त्री जगतबहादुर सुनारलगायत, कृषि राज्यम्नत्री रामकुमारी चौधरी र पर्यटन राज्यमन्त्री धनबहादुर बुढालाई हटाउने तयारी भएकाे छ ।

खानेपानीमन्त्री विना मगर, वन तथा वातावरणमन्त्री शक्तिबहादुर बस्नेत, सहरी विकासमन्त्री मोहम्मद इस्तियाक राई, अर्थमन्त्री डा. युवराज खतिवडा, सुचना सञ्चार मन्त्री गाेकुल बास्काेटा यथावत रहेने स्राेतले जनाएकाे छ ।