समाजवादी विद्यार्थी युनियनले विभिन्न ७ बुँदे माग राखेर त्रिभुवन विश्वविद्यालय उपकुलपतिको कार्यकक्षमा लगाएको ताला खोलेको छ । आज त्रिविको वार्ता समिति र युनियनबीच भएको वार्ताले मागहरु पूरा गर्ने निर्णय गर्दै ताला खोल्ने सहमति भएको हो ।
सहमतिअनुसार सरोकारवाला विद्यार्थी संघ÷संगठनसँग छलफल गरेर स्ववियुको निर्वाचनबारे निर्णय गर्ने, परीक्षा नियन्त्रण कार्यालयलाई जनशक्ति तयार गरी अनलाइन प्रणालीमा लैजाने, विश्वविद्यालयमा रहेका कर्मचारीहरुबाट बिजुली लगायतको बाँकी आवास शुल्क असुल्ने, विश्वविद्यालय परिसरमा रहेका छाप्रा, टहरा र पशुपन्छीपालन गरेको पाइए हटाउने, त्रिवि क्यालेन्डरलाई कडाइका साथ पालना गर्ने, कर्मचारी र प्राध्यापकहरु फुलटाइम नियमित गराउन इलेक्ट्रोनिक हाजिरी मेसिन जडान गर्ने सहमति भएको छ ।
त्रिविबाट वार्ता समितिको नेतृत्व अनुगमन निर्देशनालयका कार्यकारी निर्देशक विष्णुप्रसाद खनालले गर्नुभएको थियो । समाजवादी विद्यार्थी युनियनबाट त्रिवि समिति संयोजक बलबहादुर रम्तेलले वार्ता गर्नुभएको थियो । युनियनले गत ७ गतेदेखि लगाएको तालाको कारण त्रिविको कामकारबाही प्रभावित भएको थियो ।
Discussion about this post