थरुहट–थारुवान राष्ट्रिय मोर्चाले आह्वान गरेको आमहड्तालले जनजीवन प्रभावित

थरुहट–थारुवान राष्ट्रिय मोर्चाले आह्वान गरेको आमहड्तालका कारण तराईको जनजीवन प्रभावित भएको छ । कैलाली, कञ्चनपुर, बर्दिया, बाँके, दाङ, नवलपरासी सहितका तराईका जनजीवन ठप्प भएको हो ।

बन्दका कारण दाङका बजार, कलकारखाना उद्योग, व्यपार, शिक्षण संस्था लगायत यातायातका साधनहरु पूर्ण रुपमा बन्द रहेका छन् । चोक चोकमा थरुहटका कार्यकर्ताहरु देखिएका छन् । उनिहरुले अतिआबश्यक सवारी साधन, शव वाहन, दुध बोक्ने गाडी, मानवअधिकारकर्मी, पत्रकार, पर्यटन र कुटनितिक नियोगका सवारी साधनलाई सन्चालन हुन दिने बताएका छन् ।

बन्दकारण सुदूरपश्चिम प्रदेशको राजधानी पनि प्रभावित भएको छ । धनगढीबाट चल्ने लामो तथा छोटो दुरीका सवारी साधन ठप्प भएका छन् भने शिक्षण संस्था पनि पुरै बन्द छन । यातायातका साधन नचल्दा भारत लगायत विभिन्न ठाउँबाट आएका यात्रु धनगढीमा अलपत्र परेका छन ।

बन्दको पूर्व सन्ध्यामा मोर्चाले तराईको विभिन्न जिल्लामा मसाल जुलुश प्रदर्शन समेत गरेको थियो । यसैबीच प्रहरीले कञ्चनपुरबाट १ जनालाई नियन्त्रणमा लिएको छ । सोमबार साँझ प्रदर्शनको क्रममा सञ्जय रानालाई प्रहरीले नियन्त्रणमा लिएको मोर्चाले जनाएको छ । रेशम चौधरीसहित ११ जना जेलबन्दीको रिहाइ गर्नुपर्ने भन्दै सरकारसँग १४ बुँदे माग राखी आमहड्तालको घोषणा गरेको हो ।