थारु पत्रकार संघ नेपालद्वारा जेष्ठ २५ गते , आइतबारदेखि आयोजित तीनदिने निशुल्क आधारभूत पत्रकारिता तालिम मंगलबार सकिएकोछ ।
अनलाईन भर्चुअल माध्यमवाट आयोजना गरिएको तालिमको अन्तिम दिन फिल्ड रिपोटीङको बारेमा पत्रकार ठाकुरसिंह थारु र आचार संहिताको विषयमा फोनिजका केन्द्रीय अध्यक्ष डण्ड गुरुङले सहजीकरण गरेका थिए ।
तालिम समापन कार्यक्रममा बोल्दै फोनिज केन्द्रीय अध्यक्ष डण्ड गुरुङले यस्ता खालका तालिमले लेखन सँगै नेतृत्व विकासमा महत्वपूर्ण टेवा पुग्ने बताए । कार्यक्रमका प्रमुख अतिथि समेत रहनुभएका फोनिज केन्द्रीय अध्यक्ष गुरुङले अभ्यास नगरे सम्म कुनैपनि विषयमा सफलता प्राप्त नहुने बताए । थारु पत्रकारहरुले यो तालिमलाई अभ्यास गर्ने थलोको रुपमा लिन पर्ने बताए ।
कार्यक्रममा थारु पत्रकार संघका केन्द्रीय सल्लाहाकार डा. कृष्णराज सर्वहारीले जारी लडक डाउनको सहि सदुपयोग भएको भन्दै तालिममा सहभागीहरुलाई सिकेका कुरालाई कार्यान्वयनमा ल्याउन सुझाव दिए । यस्तै थारु पत्रकार संघका केन्द्रीय सल्लाहाकार लक्की चौधरीले तालिमले धेरै नयाँ कुरा सिकाएको बताए । लक डाउनको समयमा आयोजना भएको तालिमले भर्चुअल ज्ञान सिक्न र सिकाउने कामले पत्रकारिता क्षेत्रमा ठूलो अर्थ राख्ने बताए । प्रमुख प्रशिक्षक समेत रहनुभएका चौधरीले तालिममा सिकेको ज्ञानलाई पत्रकारिता भन्दा बाहिर पनि प्रयोग गर्न सकिनेमा जोड दिए ।
थारु पत्रकार संघका अध्यक्ष सन्तोष दहितको अध्यक्षतामा आयोजना गरिएको समापन कार्यक्रममा थारु पत्रकार संघ चितवनका निवर्तमान अध्यक्ष कारी महतो, मलेसियाबाट तालिममा सहभागी घनश्याम चौधरी ( आरएन थारु ), साइप्रसवाट तालिममा सहभागी भएकी सरिता चौधरीले तालिमको महत्व र यसको औचित्य सँगै तालिममा सिकेको अनुभव सुनाएका थिए ।
तालिममा थारु पत्रकार संघका महासचिव सन्तकुमार चौधरी, सल्लाहकारद्धय लक्की चौधरी, डा. कृष्णराज सर्वहारी, ठाकुर सिंह थारु, पार्वता चौधरी, प्राविधिक शिक्षक दुर्गाप्रसाद चौधरी र फोनिज केन्द्रीय अध्यक्ष डण्ड गुरुङले सहजिकरण गरेका थिए । पहिलो चरणको तालिममा काठमाण्डौं सहित, देशका विभिन्न जिल्ला र विदेशवाट गरी ८० जना सहभागी थिए । दोश्रो चरणको तालिम पुन भोलीदेखि सुरु हुँदैछ ।
तालिममा सहभागी मध्य केहिहरुले के के भने :
कारी महतो – थारु पत्रकार संघ चितवनका निवर्तमान अध्यक्ष
तालिमवाट नयाँ नयाँ कुरा सिक्ने मौका पाए । प्रविधिको प्रयोग सँगै समाचार लेखन लगायतका विषयमा राम्रो जानकारी पाए । तालिम अत्यन्तै राम्रो लाग्यो । तर यतिले मलाई पुगेन । आर्टिकल लेख्ने विषयमा अझै पूर्ण ज्ञान छैन । सिक्दैछु । म अझै नयाँ नयाँ खालका तालिम लिन चाहन्छु ।
आरएन चौधरी थारु – हाल मलेसिया ( हमार सनेश , मलाया खबरको सम्पादक )
मलाई तालिम निकै उत्कृष्ठ लाग्यो । प्रवासमै बसेर बिगतका बर्षदेखिनै पत्रकारिता गर्दै आएकोछु । सायद प्रवासमै भएर होला मैले यस्तो खालको औपचारिक तालिम लिने अवसर पाएको थिइन । यो खालको तालिमले म भित्र थप हौसला मिलेको छ। पत्रकारिताको क्षेत्रमा थप अगाडि बढ्दै जाने प्रतिबद्धता व्यक्त गर्दछु । तालिमको लागी अवसर प्रदान गरेकोमा थारु पत्रकार संघ नेपाल प्रति आभारी रहनेछु । आगामी दिनमा पनि यस्तै खालको तालिमले निरन्तता पाउँदै जाओस।
सरिता चौधरी – हाल साइप्रस
पत्रकारिता मलाई अत्यन्तै मन पर्छ । यो मेरो रुचिको विषयपनि हो । अहिले सम्म तालिम लिने अवसर पाइएको थिइन । फेसबुकमा तालिम हुने मेसेज देखेर आयोजकको सम्पर्कमा पुगें । तालिम लिने अवसर पाए अत्यन्तै खुशी छु । विदेशवाटै तालिममा सहभागीता जनाउने अवसर दिएकोमा आयोजक थारु पत्रकार संघलाई धेरै धेरै धन्यवाद । पूर्वका साथीहरुको सहभागीता कम पाए अलि दुख लाग्यो । थारु पत्रकारहरुको आन्तरिक विवाद सुनेको थिए । थारुहरु मिलेर जानुको विकल्प छैन । सबै मिलेर जानुस ।
Discussion about this post