नेपाल कम्युनिष्ट पार्टी (नेकपा)का बहुमत सचिवालय सदस्यले अध्यक्ष तथा प्रधानमन्त्री समेत रहेका केपी शर्मा ओलीलाई बैठक बोलाउन माग गर्दै दिएको लिखित ‘अल्टिमेटम’ को समय सोमबार सकिँदैछ । नेकपाका कार्यकारी अध्यक्ष पुष्पकमल दाहाल, माधवकुमार नेपाल, झलनाथ खनाल, वामदेव गौतम र नारायणकाजी श्रेष्ठ बालुवाटार पुगेर लिखित रुपमै बैठक बोलाउन माग गरेका थिए ।
लिखित पत्र बुझाएका उनीहरुले सोमबारभित्र बैठक बोलाउन अल्टिमेटम दिएका थिए । तर, ५ भाइ नेताको उक्त आग्रह र अल्टिमेटमलाई अध्यक्ष ओलीले भने वेवास्ता गरिरहेका छन् ।
बरु ओली प्रचण्डसँग छुट्टै संवाद र सहमतिपछि मात्रै बैठक बोलाउने पक्षमा छन् । त्यसका लागि उनले शनिबार ५ जना नेताहरु र आइतबार वरिष्ठ नेता माधवकुमार नेपालसहितका ४ जना नेताहरुसँगको भेटमा पनि सहमति गरेर मात्रै बैठक बोलाउनुपर्ने आशय व्यक्त गरेका छन् । ओलीको यो आशयलाई भने नेकपाका नेताहरुले उल्टो गतिको संज्ञा दिएका छन् ।
‘ओली जी पहिला नेताहरु बसेर सहमति गरौ अनि बैठक बोलाउ भन्नुहुन्छ । यो उहाँको उल्टो यात्रा र गति भयो । यसले निकास दिदैन’, वरिष्ठ नेता माधवकुमार नेपाल निकट एक स्थायी समिति सदस्यले भने, ‘ गुट भेला पनि नरोक्ने, बैठक पनि नबोलाउने ओलीको यो शैलीले नेकपा कस्तो हालतमा छ भन्ने बुझिन्छ ।’
त्यतिमात्रै होइन ओलीले आफ्नो सहमतिबिना कुनै पनि बैठक राखे पार्टी विभाजनको घोषणा हुने भन्दै अध्यक्ष प्रचण्डलाई चेतावनी नै दिएका छन् ।
यद्यपी केन्द्रीय कमिटी र गत भदौ २६ गते सम्पन्न स्थायी कमिटी बैठकको म्यान्डेटअनुरूप प्रचण्डले कार्यकारी अध्यक्षको हैसियतले बैठक बोलाउन सक्नेछन् । तर यो अधिकार भएपनि प्रचण्ड पार्टी एकतालाई जोगाउन ओलीको सहमतिमै अघि बढ्न चाहिरहेका छन् ।
‘अध्यक्ष अन्तिमसम्म पनि पार्टी एकतालाई जोगाउने पक्षमा हुनुहुन्छ । त्यसका लागि आफ्नो तर्फबाट प्रयास गरिरहनु भएको छ । तर अव एक्लै बालुवाटार गएर ओलीसँग कुरा गर्ने पक्षमा हुनुहुन्न’, प्रचण्ड निकट एक नेताले भने, ‘आज दिनभरमा पनि बैठकबारे कुनै संकेत नआए सोच्न बाध्य हुनुपर्छ ।’
५ नेताले बैठक बोलाउन गरेको लिखित आग्रहबारे महासचिव विष्णु पौडेलले अहिले कुनै निर्णय भइनसकेको जानकारी दिए । ‘त्यसबारे अहिले कुनै निर्णय भइसकेको छैन’, रातोपाटीको प्रश्नमा पौडेलले भने, ‘केही न केही उपाय त लगाउनुपर्ने हुन्छ तर के गर्ने भन्ने निश्चित भइसकेको छैन ।’
Discussion about this post