महिला आसरा सुधार केन्द्र तिलगंगाको दोस्रो वार्षिकोत्सव कार्यक्रम सोही केन्द्रकी अध्यक्ष सिर्जना थापाको प्रमुख आतिथ्यमा मंगलबार सम्पन्न भएको छ ।
सो अवसरमा केन्द्रकी अध्यक्ष थापाले केन्द्रकी पूर्वअध्यक्ष प्रमिला खनाललाई सम्मानपत्र प्रदान गर्नुभयो । साथै उहाँले केन्द्रलाई निरन्तर सहयोग गर्ने शान्ति सेवा गृह तिलगंगा काठमाडौंका कार्यक्रम संयोजक बिजेन्द्र कुवँरलाई प्रसंशापत्र, परामर्शदाता लक्ष्मण सिं अधिकारीलाई प्रशंसापत्र र नगद पुरस्कार तथा केन्द्रको सुरक्षा एवं व्यवस्थापन कार्यमा सहयोग गर्ने प्रहरी कर्मचारीहरु प्रहरी सहायक निरीक्षक शुक्रदेवी राई, प्रहरी जवानद्वय अनुपा हुमागाई र लक्ष्मी दाहाललाई नगद पुरस्कार प्रदान गर्नुभयो ।
कार्यक्रममा केन्द्रकी अध्यक्ष थापाले प्रहरी जवान भक्त बहादुर नेपालीका २ वर्षीय छोरा लक्ष्मी प्रसाद नेपालीको उपचारमा सहयोग पुर्याउने उद्देश्यका साथ आर्थिक सहायता स्वरुप नेपाल प्रहरी श्रीमती संघको तर्फबाट ५१ हजार रुपैयाँ र आसरा सुधार केन्द्रको तर्फबाट ५१ हजार रुपैयाँ गरी जम्मा १ लाख २ हजार रुपैयाँको चेक हस्तान्तरण गर्नुभयो ।
सो अवसरमा केन्द्रकी अध्यक्ष थापाले विगतमा पुरुष तथा युवाहरुमा सीमित रहेको लागूपदार्थको प्रयोग समयसँगै महिलाहरुमा समेत फैलिएर व्यक्ति, परिवार, समाज, राष्ट्र र अन्तर्राष्ट्रिय जगतलाई आक्रान्त बनाइरहेको अवस्थामा लागूऔषधको दुरुपयोग विरुद्ध चेतनामूलक कार्यक्रम गरी उपचार तथा पुनर्स्थापनामा सघाउँदै लागूऔषध मुक्त समाजको निर्माण गर्नु केन्द्रको प्रमुख उद्देश्य रहेको बताउनुभयो । लागूऔषधको कुलतमा फसेका महिला लागूऔषध प्रयोगकर्ताहरुलाई व्यक्तिगत परामर्श, सामूहिक परामर्श तथा आध्यात्मिक प्रवचन, योगाभ्यास लगायतका माध्यमहरुद्वारा उपचार गरी घर, परिवार र समाजमा पुनर्स्थापित गराई उनीहरुको सुखद भविष्य निर्माण गर्ने पवित्र उद्देश्यका साथ केन्द्रले गुणस्तरीय सेवा प्रदान गर्दै आएको उहाँले चर्चा गर्नुभयो ।
कार्यक्रममा केन्द्रकी पूर्व अध्यक्ष प्रमिला खनालले दुर्व्यसनीमा फसेका महिलाहरूलाई समाजमा पुनर्स्थापित गराउन केन्द्रको महत्वपूर्ण भूमिका रहेको बताउनुभयो । आसरा सुधार केन्द्र विशुद्ध कल्याणकारी र समाजमा सकारात्मक परिवर्तन ल्याउनका लागि सधै समर्पित रहेको उहाँले बताउनुभयो ।
केन्द्रकी सचिव रीता श्रेष्ठले स्वागत मन्तव्य व्यक्त गर्नुभएको उक्त कार्यक्रममा केन्द्रमा उपचाररत सदस्यहरुले विभिन्न साँस्कृतिक कार्यक्रम समेत प्रस्तुत गरेका थिए ।
कार्यक्रममा नेपाल प्रहरी संघ तथा केन्द्रका पदाधिकारीहरु, केन्द्रका पूर्वपदाधिकारीहरु, प्रहरी अधिकृतहरु, विभिन्न सामाजिक संघ संस्थाका प्रतिनिधिहरु, उपचाररत सदस्यका अभिभावकहरु लगायतको उपस्थिति रहेको थियो ।
Discussion about this post