प्रेम दिवसको अवसरमा सौराहामा आजदेखि फुड फेस्टिबल सुरु भएको छ । रेष्टुरेण्ट एण्ड बार एशोसियशन (रेवान) सौराहाले आयोजना गरेको फेस्टिबलको बागमती प्रदेशका सदस्य पूर्वमन्त्री कृष्णप्रसाद खनालले उद्घाटन गर्नुभयो ।
सो अवसरमा उहाँले पछिल्लो समय कोभिडका कारण थलापरेको पर्यटन व्यवसाय उकास्न यो कार्यक्रम प्रभावकारी हुने बताउनुभयो । प्रदेश सरकारले यहाँको पर्यटन व्यवसाय प्रवर्द्धनका लागि काम गरेको विगतलाई स्मरण गर्नुभयो । उहाँले सौराहाको दायरा फराकिलो बनाएर फरक ढङ्गले प्रचारात्मकरूपमा लाग्नुपर्ने बताउनुभयो ।
रत्ननगर नगरपालिकाका प्रमुख प्रह्लाद सापकोटाले सौराहाको विकास यथास्थितिमा हुँदा स्थानीय सरकार र व्यवसायीको सहकार्यमा विकासको काम अघि बढाउन आवश्यक रहेको बताउनुभयो । रेवानका केन्द्रीय अध्यक्ष अरनीको राजभण्डारी, क्षेत्रीय होटल सङ्घ सौराहाका अध्यक्ष दीपक भट्टराई, रेवान महिला समूहकी अध्यक्ष रश्मी बिडारी र रत्ननगर नगरपालिका–६ का अध्यक्ष किरण महतोले फुड फेस्टिबलको महत्त्वका बारेमा प्रकाश पार्नुभएको थियो । यसअघि सौराहामा विभिन्न जातजातिको वेशभूषासहितको शोभायात्रा गरिएको थियो ।
प्रेम दिवस मनाउन आउनेको स्वागतका लागि व्यवसायीले सौराहालाई सिँगारेका छन् । फेस्टिबलका संयोजक ध्रुव गिरीले फुड फेस्टिबल व्यवस्थित गरिएको भन्दै यहाँ आउने पर्यटकका लागि फरक फरक स्वादका खानाको व्यवस्था गरिएको बताउनुभयो । सौराहाका मुख्य बजार क्षेत्रलाई पनि सिँगारिएको छ ।
रेवानका अध्यक्ष नरेश गिरीले मुलुकको तेस्रो पर्यटकीय गन्तव्यका रूपमा स्थापित सौराहामा व्यवसायीले पर्यटन विकासका लागि फेस्टिबल आयोजना गरिँदै आएको बताउनुभयो । उहाँले भन्नुभयो, “फेस्टिबलमार्फत पर्यटक भित्र्याउने अर्को उद्देश्यले सुरु भएको फुड फेस्टिबल पछिल्लो समय प्रणय दिवस मनाउने जोडीका लागि अवसर बनेको छ ।” भ्यालेनटाइन डे मा परिवार तथा प्रेमिकासँग रमाउनेका लागि व्यवसायीले सौराहालाई उत्कृष्ट थलोका रूपमा चिनाएका छन् । सौराहामा आएका विदेशी पर्यटक तथा स्वदेशी पर्यटकले पनि सौराहामै प्रणय दिवस मनाउने गरी तयारी गरिएको आयोजकले जनाएको छ ।
‘सडकमै खाऔँ सडकमै रमाऔँ’ भन्ने नाराका साथ हात्ती चोकदेखि ड्याकसम्म र मल्लुचोकदेखि गैँडाचोकसम्मको बजार क्षेत्रमा व्यवसायीले सडक किनारमा खानाको परिकार बनाएर पर्यटकलाई बिक्रीका लागि राखेका छन् ।
संयोजक गिरीका अनुसार फेस्टिबलमा हरेक दिन हुने सडक फुड फेस्टिबलमा विभिन्न जातजातिको झाँकीको प्रस्तुति रहने छ । तीन दिनसम्म सञ्चालन हुने फुड फेस्टिबलमा स्थानीय परम्परागत तथा विदेशी खाना, स्थानीय कला संस्कृति, विभिन्न जातजातिको झाँकी प्रस्तुत हुनेछ ।
नेपालका विभिन्न समुदाय र जातिका खानाका परिकारदेखि अन्तर्राष्ट्रियस्तरका खानाको परिकार उपलब्ध हुने फुड फेस्टिबलमा दैनिक पाँच हजार पर्यटकले अवलोकन गर्ने आयोजकको अनुमान छ । करिब रु ६० लाख बराबरको आर्थिक कारोबार हुने अपेक्षा गरिएको गिरीले जानकारी दिनुभयो । कोभिडपछि यहाँको व्यवसाय उठ्न सकेको छैन । स्वदेशी र विदेशी पर्यटकको जङ्गल सफारीका लागि सौराहा पहिलो गन्तव्य हो ।
Discussion about this post