लन्डन । थारु कल्याणकारी सभा युकेको आयोजनामा माघी (खिचरी, खिचडी, खिचरा, खिचडा, तिला सकारा, माघी, माघ) पर्व तथा थारु नयाँ वर्ष २६४९ लन्डनमा भव्य रूपमा मनाइएको छ।
बुधबार लन्डनस्थित होटल हिल्टन गार्डेन इनमा आयोजित कार्यक्रममा प्रमुख अतिथिका रूपमा सहभागी बेलायतका लागि नेपालका कार्यवाहक राजदूत बिपिन दुवाडीले प्रवासमा रहेर पनि आफ्नो भाषा, संस्कृति र पहिचानको संरक्षण तथा प्रवर्द्धनमा सक्रिय थारु युवाप्रति हार्दिक बधाई तथा धन्यवाद व्यक्त गरेका थिए।
उनले छ वर्षअघि बर्दियास्थित थारु होमस्टेमा बसेको स्मरण गर्दै थारु समुदायको आतिथ्य, अनुशासन र सहयोगी संस्कार अनुकरणीय रहेको बताए। साथै बेलायतस्थित थारु समुदायसहित सबै नेपाली समुदायलाई दूतावासको तर्फबाट सक्दो सहयोग रहने प्रतिबद्धता जनाए।
कार्यक्रममा एनआरएनए युकेका अध्यक्ष राजेन्द्र पुडासैनी, आदिवासी जनजाति महासंघ युकेको उपाध्यक्ष बिमला राई, सल्लाहकार भानुभक्त राई, तमु धिं युकेका अध्यक्ष जुम काजी गुरुङ, तमु पे ह्ले संघ युके अध्यक्ष क्याप्टेन डेम बहादुर गुरुङ, मगर संघ युकेको युवा बिभाग अध्यक्ष दिपक माइथाने मगर, आदिवासी जनजाति महासंघ पोर्तुगलको पूर्व उपाध्यक्ष सबिन रोका मगर, प्रतिभा नक्षत्रको अध्यक्ष राजेन्द्र खस, किरात राई यायोख्या युके तथा युरोपलगायत विभिन्न संघ–संस्थाका प्रतिनिधिहरूले शुभकामना मन्तव्य व्यक्त गरेका थिए।
कार्यक्रममा कलाकारहरूले थारु सांस्कृतिक नृत्य प्रस्तुत गरेका थिए । सांस्कृतिक कार्यक्रमले हल नै गुञ्जायमान बनाएको थियो ।
कार्यक्रममा अतिथिहरूलाई टोकन अफ लभ प्रदान गरिएको थियो। साथै चिचर, ढीक्री, हाँसको मासु, माछा, तिलको लड्डुलगायत परम्परागत थारु परिकारमार्फत स्वागत गरिएको थियो।
थारु कल्याणकारी सभा युकेका अध्यक्ष कवि कुसुम्याले बेलायतमा बसोबास गरिरहेका थारु युवालाई एकताबद्ध गर्दै थारु भाषा, संस्कृति र पहिचानको प्रवर्द्धन गर्ने उद्देश्यले कार्यक्रम आयोजना गरिएको बताए। उनले माघी पर्वको शुभकामना व्यक्त गर्दै सहभागी, कलाकार तथा प्रायोजकहरूलाई धन्यवाद दिए।
कार्यक्रममा बेलायतभरि बसोबास गर्ने थारुहरुको परम्परागत थारु पोशाकमा उपस्थिति रहेको थियो ।
यो पर्वलाई नेपालमा ठाउँअनुसार खिचरी, खिचडी, खिचरा, खिचडा, तिला सकारा, माघी, माघ पनि भन्ने गरिन्छ।
