लन्डन। युनाइटेड किंगडममा बसोबास गर्ने कर्णाली क्षेत्रका नेपालीहरूद्वारा ‘कर्णाली समाज यूके’ गठन गरिएको छ। समाजको संयोजकमा जीवन शाही चयन हुनुभएको छ भने ११ सदस्यीय तदर्थ समिति समेत गठन गरिएको छ।
समाजले एक महत्वपूर्ण मानवीय पहलको रूपमा ८० जना सडकमा बसोबास गर्ने, मानसिक रूपमा कमजोर, वेसाहारा, अशक्त, अनाथ र अभिभावकविहीन आमा–बुबा, दाजुभाइ, दिदीबहिनीहरूलाई एक छाक भोजन खुवाउने निर्णय गरेको छ।
समाजका सदस्यहरूका अनुसार, उक्त कार्यक्रमबाट यूकेमा बसोबास गर्ने नेपाली समुदायबीच सहानुभूति, मानवता र एकताको सन्देश फैलाउने लक्ष्य लिइएको छ।
“हामी सबैले मिलेर सानो प्रयासबाट पनि ठूलो परिवर्तन ल्याउन सक्छौं,” संयोजक शाहीले बताउनुभयो।
कर्णाली समाज यूकेले आगामी दिनमा सामाजिक सहयोग, समुदाय सशक्तीकरण र मानवीय अभियानहरूमा सक्रिय भूमिका निर्वाह गर्ने प्रतिबद्धता जनाएको छ।
