काठमाडौं । ‘अभिभावक शिक्षा आजको आवश्यकता’ भन्ने मूल नाराका साथ ‘कोमल अभिभावकत्व’ पुस्तक विमोचन तथा सम्मान कार्यक्रम राजधानीमा भव्य रूपमा सम्पन्न भएको छ।
हाम्रो बालापन नेपालका अध्यक्ष मथुरा थापाद्वारा लिखित उक्त पुस्तक कार्यक्रमका प्रमुख अतिथि तथा प्रतिनिधिसभा सदस्य डा. धनञ्जय रेग्मीद्वारा औपचारिक रूपमा विमोचन गरिएको हो।
कार्यक्रममा अभिभावक, शिक्षाविद्, मनोविद् तथा विभिन्न सामाजिक क्षेत्रमा सक्रिय व्यक्तिहरूको उल्लेखनीय उपस्थिति रहेको थियो।
विमोचित पुस्तक ‘कोमल अभिभावकत्व’मा बालबालिकालाई माया, ममता, स्नेह र सकारात्मक व्यवहारमार्फत कसरी हुर्काउने भन्ने विषयलाई व्यावहारिक तथा अनुभवजन्य ढंगले प्रस्तुत गरिएको जनाइएको छ।
कार्यक्रममा बोल्दै डा. रेग्मीले बालबालिकाको मानसिक स्वास्थ्यप्रति सचेत रहन अभिभावकलाई आग्रह गर्नुभयो। उहाँले सामान्य तनावले पनि बालबालिकाको मानसपटलमा गम्भीर असर पार्न सक्ने उल्लेख गर्दै उनीहरूप्रति सधैं स्नेह र सकारात्मक व्यवहार आवश्यक रहेको बताउनुभयो।
त्यसैगरी, मनोविद् डा. गंगा पाठकले बालबालिकाको भावनात्मक विकासमा अभिभावकको व्यवहार निर्णायक हुने धारणा राख्नुभयो। उहाँले डर, दबाब वा कठोर व्यवहारभन्दा पनि सहानुभूति, संवाद र समझदारीमार्फत बालबालिकालाई मार्गदर्शन गर्नुपर्नेमा जोड दिनुभयो।
साहित्यकार डा. बिदुर चालिसेले पुस्तकले अभिभावकलाई बालबालिकासँग व्यवहार गर्ने सही तरिका सिकाउने विश्वास व्यक्त गर्दै यसलाई उपयोगी कृतिको रूपमा व्याख्या गर्नुभयो।
कार्यक्रममा नेपाल पत्रकार महासंघका उपाध्यक्ष उमिदप्रसाद बागचन्द, प्रेस काउन्सिलका सदस्य शान्तराम बिडारी, महासंघका अध्यक्ष शोभा अर्याल तथा प्याब्सन ललितपुरका अध्यक्ष अर्जुन महर्जनलगायतले शुभकामना मन्तव्य व्यक्त गर्नुभएको थियो।
लेखिका मथुरा थापाले बालबालिकाको क्षेत्रमा लामो समयदेखि संलग्न रहँदा प्राप्त अनुभवलाई पुस्तकमा समेटिएको बताउनुभयो। देशका विभिन्न स्थानमा देखिएका अभिभावक–बालबालिका सम्बन्धी व्यवहारिक समस्या, चुनौती र समाधानका उपायहरू पुस्तकमा समावेश गरिएको उहाँको भनाइ थियो।
कार्यक्रममा समाजसेवा, पत्रकारिता तथा शिक्षा क्षेत्रमा योगदान पुर्याउने विभिन्न व्यक्तित्वहरूलाई सम्मान समेत गरिएको थियो। जसमा डा. गंगा पाठक, पत्रकार प्रकाश सिलवाल तथा फोटा पत्रकार पासाङकाजी शेर्पालगायत रहेका छन्।
आयोजकका अनुसार यस्ता कार्यक्रममार्फत अभिभावक शिक्षा, बाल अधिकार र बालमैत्री समाज निर्माणका लागि जनचेतना अभिवृद्धि गर्ने लक्ष्य राखिएको छ।
कार्यक्रमले अभिभावकत्वको बदलिँदो स्वरूप, बालबालिकाको मानसिक तथा भावनात्मक विकासमा आवश्यक संवेदनशीलता तथा सकारात्मक सोचको महत्वलाई उजागर गरेको सहभागीहरूले बताएका छन्।
