काठमाडौं । होल्डिङ सेन्टरमा रहेका ५२ जना बालबालिका आजदेखि विद्यालय जान थालेका छन्। शिक्षा विभागले विद्यार्थी तथा अभिभावकसँग परामर्श गरेर शैक्षिक क्रियाकलापलाई निरन्तरता दिने कार्यक्रम अघि बढाएको जनाएको छ।
विद्यालय उमेर समूहका बालबालिकामध्ये ३० जनाका अभिभावकले आफ्ना नानीबाबुलाई छात्राबासमा राखेर पढाउन इच्छा व्यक्त गरेका छन्। शिक्षा विभागले अभिभावकको चाहना बुझ्न फाराम भराउने प्रक्रिया सञ्चालन गरेको थियो।
प्राप्त विवरणअनुसार ११ जना छात्रा र १९ जना छात्र छात्राबासमा बस्न इच्छुक रहेका छन्। यता ५ जना छात्रा र ६ जना छात्रले भने छात्राबासमा बस्न अनिच्छा व्यक्त गरेका छन्। अन्य अभिभावकबाट भने अझै स्पष्ट धारणा प्राप्त हुन नसकेको विभागले जनाएको छ।
शिक्षा विभागका वरिष्ठ शाखा अधिकृत सुशील सुवेदीका अनुसार विद्यार्थीहरूलाई आवश्यक पर्ने पोशाक, शैक्षिक सामग्री तथा अन्य आधारभूत आवश्यकता सम्बन्धी विवरण पनि संकलन भइरहेको छ।
विभागले बालबालिकाको पढाइमा अवरोध नहोस् भन्ने उद्देश्यले विद्यालय भर्ना, छात्राबास व्यवस्थापन तथा आवश्यक सहयोगको कामलाई प्राथमिकतामा राखेको जनाएको छ। साथै विद्यार्थीको मनोवैज्ञानिक अवस्था र सिकाइ वातावरणलाई समेत ध्यानमा राखेर कार्यक्रम सञ्चालन गरिने बताइएको छ।
