काठमाडौँ। निर्वाचन आयोग नेपाल ले यही फागुन २१ गते सम्पन्न हुने प्रतिनिधिसभा सदस्य निर्वाचनलाई लक्षित गर्दै आज राति १२ बजेदेखि प्रचारप्रसार निषेध अवधि अर्थात् मौन अवधि सुरु हुने जनाएको छ।
आयोगका अनुसार मतदान हुने दिनको अघिल्लो ४८ घण्टादेखि मतदान सम्पन्न भई मतदान केन्द्र बन्द नहुन्जेलसम्म मौन अवधि लागू हुनेछ। यस अवधिमा उम्मेदवार, राजनीतिक दल तथा सम्बन्धित व्यक्तिले निर्वाचन आचारसंहितामा व्यवस्था गरिएका विशेष आचरणहरूको अनिवार्य पालना गर्नुपर्नेछ।
आयोगले मतदाताले आफ्नो विवेक र अन्तरआत्माको आधारमा स्वतन्त्र निर्णय गर्न पाउने वातावरण सुनिश्चित गर्न मौन अवधि आवश्यक रहेको जनाएको छ। यसले स्वच्छ र निष्पक्ष प्रतिस्पर्धालाई प्रवर्द्धन गर्ने विश्वास आयोगको छ।
मौन अवधिमा कुनै पनि प्रकारको सार्वजनिक सभा, जुलुस, कोणसभा, राजनीतिक विज्ञापन, सामाजिक सञ्जालमार्फत प्रचारप्रसार, एसएमएस वा अन्य माध्यमबाट सन्देश सम्प्रेषण लगायत निर्वाचन प्रचारसँग सम्बन्धित गतिविधि पूर्ण रूपमा निषेध गरिएको छ।
त्यसैगरी, मतदान हुने दिनभन्दा ४८ घण्टा अगावै मतदान स्थलको तीन सय मिटर वरिपरि राखिएका राजनीतिक दल वा उम्मेदवारका पोस्टर, ब्यानर, झण्डा तथा अन्य प्रचार सामग्री हटाउनुपर्ने व्यवस्था गरिएको छ। सामाजिक सञ्जाल, अनलाइन पोर्टल, छापा तथा अन्य सञ्चार माध्यमबाट कुनै दल वा उम्मेदवारको पक्ष वा विपक्षमा सामग्री पोष्ट, शेयर वा प्रसारण गर्नसमेत रोक लगाइएको छ।
मतदान कार्य प्रारम्भ हुनुभन्दा तीन घण्टा अघिदेखि मतदान कार्य सम्पन्न नभएसम्म मतदाता, मतदान अधिकृत वा कर्मचारीलाई अवरोध पुग्ने कुनै पनि गतिविधि गर्न नपाइने आचारसंहितामा उल्लेख छ।
संविधानले प्रदान गरेको अधिकारअनुसार निर्वाचनको सञ्चालन, रेखदेख, निर्देशन, नियन्त्रण र समन्वयका लागि आवश्यक सम्पूर्ण तयारी पूरा भइसकेको आयोगले जनाएको छ। आचारसंहिताको इमान्दारीपूर्वक पालना र प्रभावकारी कार्यान्वयनबाट निर्वाचनको निष्ठा कायम हुने र सजग मतदाता निर्माणमा सहयोग पुग्ने आयोगको विश्वास छ।
