लण्डन । अमेरिकी प्रविधि कम्पनी Amazon ले बेलायतमा पहिलो पटक ड्रोनमार्फत सामान डेलिभरी सेवा सुरु गरेको छ। कम्पनीले सीमित परीक्षणका रूपमा इङ्ग्ल्यान्डको Darlington मा यो सेवा सञ्चालनमा ल्याएको हो।
यस सेवाअन्तर्गत ५ पाउन्ड (करिब २.२ किलोग्राम) भन्दा कम तौल भएका दैनिक प्रयोगका सामानहरू Amazon को फुलफिलमेन्ट सेन्टरबाट ७.५ माइल (१२ किलोमिटर) वरपरका क्षेत्रमा ड्रोनमार्फत डेलिभरी गरिनेछ। कम्पनीका अनुसार ग्राहकले अर्डर गरेको सामान दुई घण्टाभित्रै प्राप्त गर्न सक्नेछन्।
Amazon ले सुरुवाती चरणमा प्रतिघण्टा अधिकतम १० वटा उडान र दिनमा करिब १०० वटा डेलिभरी गर्ने योजना बनाएको जनाएको छ। कम्पनीले भविष्यमा अल्ट्रा-फास्ट डेलिभरीको माग बढ्दै गएसँगै यो सेवा विस्तार गर्ने अपेक्षा गरेको छ।
बेलायतमा यसअघि पनि ड्रोन प्रयोग गरेर विभिन्न सेवाहरू सञ्चालन भइरहेका छन्। NHS ले लन्डनमा रगत आपूर्ति गर्न ड्रोन परीक्षण गरिरहेको छ भने Royal Mail ले Orkney का दुर्गम क्षेत्रमा पार्सल पठाउन ड्रोन प्रयोग गर्दै आएको छ।
तर दैनिक किनमेलका सामान डेलिभरी गर्न ड्रोन प्रयोग गरिएको यो पहिलो अवसर हो। हाल Darlington अमेरिका बाहिर Amazon ले ड्रोन डेलिभरी सेवा सञ्चालन गरेको एकमात्र स्थान बनेको छ। कम्पनीले यो सेवा अझै प्रारम्भिक परीक्षण चरणमै रहेको र आगामी दिनमा थप अध्ययन तथा परीक्षण जारी रहने जनाएको छ।
