दुबई, यूएई । थारु कल्याणकारिणी सभा (था.क.स) यूएईले थारु समुदायको पौराणिक पर्व जितिया अवसरमा “डटकट/वडगन” (दर खाने) कार्यक्रम सम्पन्न गरेको छ। कार्यक्रम गत १४ सेप्टेम्बर २०२५ मा दुबईस्थित गाउवेशी रेष्टुरेन्टमा गरिएको हो।
यसअघि हरेक वर्ष खुला पार्कमा राति आयोजना हुँदै आएको यो कार्यक्रम यस पटक पहिलोपटक रेष्टुरेन्टभित्र सम्पन्न गरिएको हो। जितिया पर्वमा विशेषगरी थारु महिलाहरूले आफ्ना पति, सन्तान र दाजुभाइहरूको दीर्घायु तथा सर्वगुण सम्पन्नताको कामना गर्दै व्रत बस्ने परम्परा रहेको हुँदा महिलाको बाक्लो सहभागिता रहेको थियो।
साधारण स्वरूपमा आयोजना गरिएको कार्यक्रम प्रमुख अतिथिका रूपमा आदिवासी जनजाति महासंघ (नेफिन) यूएईका अध्यक्ष भागरथी कुमार भगत, महासंघका महिला पदाधिकारीहरू तथा था.क.स यूएईका अग्रज सदस्यहरूको उपस्थितिमा सम्पन्न भएको थियो। अतिथिहरूले शुभकामना आदान–प्रदान गर्दै विदेशमा रहेर पनि आफ्ना परम्परा, संस्कार र संस्कृति जीवित राख्न समुदाय एकजुट हुनुपर्नेमा जोड दिएका थिए।
अनौपचारिक कार्यक्रममा परम्परागत जितिया गीत गाइयो भने डिजिटल भर्सनका आधुनिक गीतमा सहभागीहरूले नाचगान गर्दै रमाइलो गरेका थिए। अन्त्यमा सबैले जितिया पर्वको शुभकामना आदानप्रदान गर्दै कार्यक्रम सम्पन्न भएको थियो।
