लन्डन । बेलायतको रोयल बरो अफ ग्रीनवीच अन्तर्गत पर्ने प्लमस्टेड एण्ड ग्लिण्डन वार्डबाट नेपाली मूलका नेता तथा पूर्व मेयर जीत रानाभाट पुनः काउन्सिलर पदमा निर्वाचित भएका छन्। लेबर एण्ड को-अपरेटिभ पार्टीका तर्फबाट उम्मेदवारी दिएका रानाभाटले शानदार मतसहित दोस्रो कार्यकालका लागि जित हासिल गरेका हुन्।
चुनावी परिणाम अनुसार रानाभाटले कुल १,६१० मत प्राप्त गर्दै आफ्नो राजनीतिक प्रभाव र लोकप्रियता पुनः स्थापित गरेका छन्। स्थानीय तहमा सक्रिय नेतृत्व, समुदायसँगको निकट सम्बन्ध तथा सामाजिक कामका कारण उनले व्यापक समर्थन प्राप्त गरेको विश्लेषण गरिएको छ।
रानाभाटले यसअघि सन् २०२४ देखि २०२५ सम्म रोयल बरो अफ ग्रीनवीचको मेयरका रूपमा ऐतिहासिक कार्यकाल पूरा गरिसकेका छन्। उनी ग्रीनवीच Borough को इतिहासमै पहिलो नेपाली मूलका मेयर बन्न सफल भएका थिए, जसलाई बेलायतस्थित नेपाली समुदायले गौरवपूर्ण उपलब्धिका रूपमा लिएको थियो।
सन् २०२२ मा पहिलो पटक काउन्सिलर निर्वाचित भएका रानाभाट स्थानीय राजनीति, सामुदायिक विकास तथा सार्वजनिक सेवामा सक्रिय नेताका रूपमा परिचित छन्। विशेषगरी नेपाली समुदाय, युवा सहभागिता, सामाजिक समावेशिता तथा स्थानीय सेवा सुधारका विषयमा उनले निरन्तर आवाज उठाउँदै आएका छन्।
उनको पुनः विजयलाई बेलायतमा नेपाली समुदायको बढ्दो राजनीतिक पहुँच र प्रतिनिधित्वको महत्वपूर्ण संकेतका रूपमा हेरिएको छ। स्थानीय नेपाली समुदाय तथा विभिन्न सामाजिक संघसंस्थाले रानाभाटलाई बधाई दिँदै आगामी कार्यकाल सफलताको शुभकामना दिएका छन्।
