काठमाडौँ । नेपाल प्रहरीका नव–नियुक्त महानिरीक्षक (IGP) दान बहादुर कार्की बिहीबार दर्ज्यानी चिन्हबाट सुशोभित हुनुभएको छ। नेपाल सरकार मन्त्रिपरिषद्को २०८२ कात्तिक २४ गतेको निर्णयअनुसार प्रहरी महानिरीक्षकमा पदोन्नति हुनुभएका कार्कीलाई गृह मन्त्रालय सिंहदरबारमा आयोजित विशेष समारोहबीच गृहसचिव रामेश्वर दंगालले दर्ज्यानी चिन्ह प्रदान गर्नुभएको हो।
समारोहमा गृहसचिव दंगालले नेपाल सरकारले विधि र पद्धतिको आधारमा नेपाल प्रहरीको प्रमुखको रूपमा कार्कीलाई जिम्मेवारी दिएको उल्लेख गर्दै, उहाँको नेतृत्वमा देशभर शान्ति–सुरक्षा तथा सुशासन कायम हुने विश्वास व्यक्त गर्नुभयो। उहाँले निष्पक्ष र भयरहित वातावरणमा आगामी निर्वाचन सम्पन्न गर्न नेपाल प्रहरीको महत्वपूर्ण भूमिका रहने बताउँदै, सरकार त्यसका लागि पूर्ण रूपमा प्रतिबद्ध रहेको स्पष्ट पार्नुभयो।
गृहसचिव दंगालले हाल देखिएका विकृति–विसंगतिहरू अन्त्य गरी सुशासन स्थापना गर्न सरकारको दायित्व रहेको र त्यसका लागि नेपाल प्रहरीसँग घनिष्ठ समन्वय र सहकार्य हुने प्रतिवद्धता जनाउनुभयो।
दर्ज्यानी चिन्ह ग्रहण गर्दै प्रहरी महानिरीक्षक कार्कीले नेपाल सरकारले आफ्नो करिब २८ वर्षको समर्पण, निष्ठा र इमानदारीको कदर गर्दै जिम्मेवारी सुम्पेकोमा कृतज्ञता व्यक्त गर्नुभयो। उहाँले यो जिम्मेवारीलाई पेशागत अनुशासन, पारदर्शिता र जवाफदेहिताका साथ निभाउँदै नागरिक सुरक्षाको पूर्ण प्रत्याभूति दिने प्रतिवद्धता जनाउनुभयो।
कार्कीले देशमा सुशासन कायम गर्नु, निर्वाचनलाई भयरहित बनाउनु र सुरक्षा चुनौतीहरूको सामना गर्न संगठनलाई सुदृढ बनाउने, मनोबल उच्च राख्ने र प्रभावकारी समन्वय गर्ने योजना रहेको बताउनुभयो।
कार्यक्रममा राष्ट्रिय अनुसन्धान विभागका मुख्य अनुसन्धान निर्देशक टेकेन्द्र कार्की, प्रहरी अतिरिक्त महानिरीक्षकहरू, प्रहरी नायव महानिरीक्षकहरू, गृह मन्त्रालयका उच्च अधिकारी तथा सञ्चारकर्मीहरूको उपस्थिति रहेको थियो।
दर्ज्यानी चिन्ह प्राप्त गरेपछि IGP कार्कीले प्रहरी प्रधान कार्यालय नक्सालमा कार्यभार ग्रहण गर्दै पदबहाली गर्नुभयो। कार्यालय प्रवेश गर्दा उहाँलाई अतिरिक्त महानिरीक्षक, नायव महानिरीक्षक तथा प्रहरी अधिकृतहरूले स्वागत गरेका थिए।
त्यस अवसरमा कार्कीले अमर प्रहरी स्मारकमा पुष्पहार अर्पण गरी अमर प्रहरीप्रति श्रद्धाञ्जली समेत अर्पण गर्नुभयो।
प्रहरी महानिरीक्षक दान बहादुर कार्कीको संक्षिप्त जीवनी
प्रहरी महानिरीक्षक दान बहादुर कार्की नेपाल प्रहरीका ३३औं IGP हुनुहुन्छ। उहाँको जन्म वि.सं. २०२९ साउन १५ गते गुल्मी जिल्लाको साविक घमिर–५ (हाल मालिका गाउँपालिका–७) मा पिता कृष्ण बहादुर कार्की र माता चन्द्रकला कार्कीको कोखमा भएको हो।
कार्कीले वि.सं. २०५४ चैत १८ गते प्रहरी निरीक्षक पदबाट सेवा आरम्भ गर्नुभएको हो। त्यसयता उहाँले प्रहरी नायव उपरीक्षकदेखि अतिरिक्त महानिरीक्षकसम्मका जिम्मेवारी सफलतापूर्वक वहन गर्नुभएको छ।
राजनीतिशास्त्रमा स्नातकोत्तर कार्कीले उच्चस्तरीय राष्ट्रिय सुरक्षा तालिम, अपरेशनल कमाण्ड, मानवअधिकार, अपराध अनुसन्धान, रेस्क्यू तालिमलगायत २२ वटा राष्ट्रिय तथा अन्तर्राष्ट्रिय तालिम हासिल गर्नुभएको छ। उहाँ ‘प्रबल जनसेवा श्री’, संयुक्त राष्ट्रसंघ पदक लगायतका विभूषणबाट सम्मानित हुनुहुन्छ।
उहाँले आफ्नो करियरमा रुकुम, तनहुँ, सप्तरी, कास्की, कपिलवस्तु, काठमाडौं, सुर्खेत र दाङसहित देशका विभिन्न प्रहरी इकाइहरूमा नेतृत्व प्रदान गर्नुभएको थियो। अतिरिक्त महानिरीक्षकको रूपमा उहाँले मानवस्रोत विभाग र काठमाडौं उपत्यका प्रहरी कार्यालय रानीपोखरीको कमाण्ड गर्नुभएको थियो।
प्रहरी महानिरीक्षक कार्कीले आफ्नो कार्यकालमा संगठन सुदृढिकरण, सुशासन प्रवर्द्धन र जनविश्वास अभिवृद्धिमा विशेष ध्यान दिने प्रतिबद्धता जनाउनुभएको छ।
