कावासोती । दुईवटा निर्वाचन क्षेत्र रहेको नवलपुर जिल्लामा प्रतिनिधि सभा सदस्य निर्वाचनका लागि ११ जना स्वतन्त्रसहित ३७ जनाको उम्मेदवारी दर्ता भएको छ।
मुख्य निर्वाचन अधिकृतको कार्यालयका अनुसार नवलपुर निर्वाचन क्षेत्र नं. १ मा ४ जना स्वतन्त्र उम्मेदवार र १४ राजनीतिक दलका १५ जना गरी कुल १९ जनाको उम्मेदवारी परेको छ। त्यस्तै क्षेत्र नं. २ मा ६ जना स्वतन्त्र र १२ राजनीतिक दलका १२ जना गरी १८ जनाको उम्मेदवारी दर्ता भएको छ।
आगामी फाल्गुन २१ गते हुने प्रतिनिधि सभा सदस्य निर्वाचनका लागि ठूला दलहरू नेपाली कांग्रेस, नेकपा एमाले, नेकपा, राष्ट्रिय स्वतन्त्र पार्टी (रास्वपा) लगायतका दलले दलबलसहित उम्मेदवारी दर्ता गराएका छन्।
त्यसैगरी राष्ट्रिय प्रजातन्त्र पार्टी (राप्रपा), प्रगतिशील लोकतान्त्रिक पार्टी, जनता समाजवादी पार्टी, श्रम संस्कृति पार्टी, मंगोल नेसनल अर्गनाइजेसन, उज्यालो नेपाल, राष्ट्रिय जनशक्ति पार्टी, आम जनता पार्टी, राष्ट्रिय जनमोर्चा र राष्ट्रिय जनमुक्ति पार्टी लगायतका दलका उम्मेदवारले पनि उम्मेदवारी दर्ता गराएको मुख्य निर्वाचन अधिकृतको कार्यालयका सूचना अधिकारी प्रेमप्रसाद पौडेलले जानकारी दिनुभयो।
नेपाली कांग्रेसका तर्फबाट नवलपुर–१ मा जिल्ला उपाध्यक्ष बालकृष्ण घिमिरे र गजेन्द्र आलेले उम्मेदवारी दर्ता गराएका छन् भने नवलपुर–२ बाट ओमप्रकाश घर्ती उम्मेदवार रहनुभएको छ।
त्यस्तै नेकपा एमालेबाट नवलपुर–१ मा भागीरथ सापकोटा र नवलपुर–२ मा तिलक महतले उम्मेदवारी दिनुभएको छ।
नेकपाबाट नवलपुर–१ मा लोकप्रसाद भुर्तेल र नवलपुर–२ मा गणेशमान महतो, राष्ट्रिय स्वतन्त्र पार्टीबाट नवलपुर–१ मा राजन गौतम र नवलपुर–२ मा मनिष खनाल उम्मेदवार रहनुभएको छ।
यसैगरी राप्रपाबाट नवलपुर–१ मा दीपक बस्ताकोटी र नवलपुर–२ मा रुनकुमारी महतो, श्रम संस्कृति पार्टीबाट नवलपुर–१ मा भिमचन्द्र गुरुङ र नवलपुर–२ मा कमल चापागाईले उम्मेदवारी दर्ता गराउनुभएको छ।
प्रगतिशील लोकतान्त्रिक पार्टीबाट नवलपुर–१ मा सौगात महतो र नवलपुर–२ मा मानसिंह महतो, **नेकपा (माओवादी)**बाट नवलपुर–१ मा बेलबहादुर सारु र नवलपुर–२ मा गंगाप्रसाद ज्ञवाली (सुमन) उम्मेदवार रहनुभएको छ।
त्यस्तै जनता समाजवादी पार्टीबाट नवलपुर–१ मा छविलाल राना मगरले उम्मेदवारी दर्ता गराउनुभएको छ।
निर्वाचन मिति नजिकिँदै जाँदा नवलपुर जिल्लामा चुनावी सरगर्मी र राजनीतिक गतिविधि थप तीव्र बन्दै गएको छ।
