अर्को विवाह गरेमा एकल महिला अर्थात् विधवाले पूर्वपतिबाट पाएको सम्पत्ति फिर्ता गर्नुपर्ने कानुनी व्यवस्था खारेज भएको छ।
सर्वोच्च अदालतको संवैधानिक इजलासले मुलुकी देवानी संहिता ऐन, २०७४ को दफा २१४(२) मा रहेको व्यवस्था खारेज गरेको हो। उक्त दफामा विधवाले अर्को विवाह गरेमा अंशबापत पाएको सम्पत्ति अघिल्लो पतितर्फका छोराछोरीले, छोराछोरी नभए आफैंले लिन पाउने व्यवस्था थियो।
अदालतको यो निर्णयसँगै पुनर्विवाह गरेकै आधारमा महिलाको सम्पत्तिमाथिको अधिकार खोसिने व्यवस्था अन्त्य भएको छ। महिला अधिकारकर्मीहरूले यसलाई लैंगिक समानता र सम्पत्तिमाथि महिलाको स्वतन्त्र अधिकारका पक्षमा महत्वपूर्ण फैसला मानेका छन्।
यसअघि सम्बन्धविच्छेद वा पुनर्विवाहका अवस्थामा महिलाले पूर्वपतिबाट पाएको अंश फिर्ता गर्नुपर्ने प्रस्तावसमेत चर्चामा आएको थियो।
