काठमाडौँमा रात्रिबस चल्ने

काठमाडौं — काठमाडौँ उपत्यकामा रात्रिकालीन सार्वजनिक यातायात सेवा विस्तार गर्ने तयारीसँगै काठमाडौँ महानगरपालिकाले अन्तरनगर सहकार्य र समन्वयका लागि पहल थालेको छ।

रात्रिकालीन यातायात सेवा सञ्चालनका लागि अन्तरनगर सहकार्य, समन्वय तथा साझेदारीको प्रस्ताव लिएर काठमाडौँ महानगरपालिकाका कार्यवाहक प्रमुख सुनिता डंगोल आज भक्तपुर नगरपालिका र मध्यपुर थिमी नगरपालिका पुग्नुभएको छ।

कार्यवाहक प्रमुख डंगोलले भक्तपुर नगरपालिकाका प्रमुख सुनिल प्रजापती, उपप्रमुख रजनी जोशी, मध्यपुर थिमी नगरपालिकाका प्रमुख सुरेन्द्र श्रेष्ठ तथा उपप्रमुख विजयकृष्ण श्रेष्ठसँग भेट गरी रात्रिकालीन सार्वजनिक यातायात सञ्चालनका विषयमा छलफल गर्नुभएको हो।

छलफलका क्रममा उपत्यकाका विभिन्न नगरपालिकाबीच समन्वय गर्दै रातको समयमा पनि सुरक्षित, भरपर्दो र सहज सार्वजनिक यातायात सेवा उपलब्ध गराउने विषयमा सहकार्यको प्रस्ताव प्रस्तुत गरिएको थियो।

कार्यवाहक प्रमुख डंगोलसँगै छलफल टोलीमा काठमाडौँ महानगरपालिकाका प्रमुख प्रशासकीय अधिकृत मुक्तिराम अर्याल, निर्देशक वसन्त आचार्य, साझा यातायातका अध्यक्ष शुशिलराज प्याकुरेल तथा कार्यकारी निर्देशक भुपेन्द्र अर्याल सहभागी हुनुहुन्थ्यो।

काठमाडौँ उपत्यकामा असोज ३ गतेदेखि २८ वटा रात्रि बसमार्फत ६ वटा नयाँ रुटमा सेवा सञ्चालन गर्ने तयारी गरिएको छ। रात्रिकालीन बस सेवा सञ्चालन भएपछि रातको समयमा यात्रा गर्ने सर्वसाधारण, श्रमिक, विद्यार्थी तथा विभिन्न पेशा–व्यवसायमा संलग्न नागरिकलाई सार्वजनिक यातायातको पहुँच सहज हुने अपेक्षा गरिएको छ।

महानगरपालिकाले रात्रिकालीन यातायातलाई प्रभावकारी बनाउन सम्बन्धित स्थानीय तह, यातायात व्यवसायी तथा सरोकारवाला निकायबीच आवश्यक समन्वय र साझेदारीलाई प्राथमिकता दिएको जनाएको छ।

उपत्यकाका विभिन्न स्थानीय तहलाई जोडेर सञ्चालन हुने रात्रिकालीन बस सेवाले रातको समयमा सार्वजनिक यातायातको उपलब्धता बढाउनुका साथै निजी सवारीसाधनमा निर्भरता घटाउन सहयोग पुग्ने अपेक्षा गरिएको छ।