धनगढी । सुदूरपश्चिम तथा तराई क्षेत्रमा बसोबास गर्ने थारु समुदायमा परम्परादेखि खेलिँदै आएको मौलिक खेल ‘भोदी’ सुरु भएको छ । आधुनिक खेल र प्रविधिको प्रभाव बढ्दै जाँदा गाउँघरमा खेलिने भोदी खेल हराउँदै जान थालेपछि थारु समुदायका युवा तथा अगुवाहरु यसको संरक्षणका लागि परम्परागत खेल भोदीको आयोजना गर्दै आएका छन् । कैलारी गाउँपालिका वडा नम्बर ८ लोहलपुरको युवा जनहित क्लबले परम्परागत खेल भोदीको आयोजना गर्दै आएको छ । थारु समुदायको बर्का भजहर पर्वको अवसरमा आयोजना गरिएको भोदी खेलको सुदुरपश्चिम प्रदेश खेलकुद परिषदका सदस्य सचिव लोकवहादुर खड्का रविले उद्घाटन गरे ।
भोदी खेल विशेषगरी थारु समुदायले अनत पर्व तथा विभिन्न सांस्कृतिक अवसरमा खेल्ने गर्दछन् । यो खेल समूहमा खेलिने परम्परागत खेल हो । खेलमा दुई समूह बनाइन्छ र प्रत्येक समूहमा करिब १० जना खेलाडी सहभागी हुन्छन् । खेल मैदानको बीच भागमा सानो खाडल बनाएर त्यसमा काठका लट्ठीहरू राखिन्छन्, जसलाई थारु भाषामा “टाँचा” भनिन्छ । खेलाडीहरूले पालैपालो झटारो हानेर खाडलभित्र रहेका ती लट्ठी बाहिर निकाल्ने प्रयास गर्छन् । निर्धारित समयभित्र सबैभन्दा धेरै लट्ठी निकाल्न सफल हुने समूह विजेता घोषित हुने प्रचलन रहेको छ । यो खेलमा शारीरिक फुर्तिका साथै समूह समन्वय, रणनीति र एकताको महत्वपूर्ण भूमिका रहने गर्दछ ।
