बर्दिया । बर्दियाको ठाकुरबाबा नगरपालिकामा १५ शैयाको सुविधा सम्पन्न नगर अस्पताल सञ्चालनमा आएको छ। नगरप्रमुख तिलकराम लम्सालले एक कार्यक्रमबीच अस्पतालको उद्घाटन गर्नुभएको हो।
करीब १२ करोड ८४ लाख रुपैयाँको लगानीमा वडा नं. ३ नेउलापुरमा निर्माण गरिएको उक्त अस्पतालले अब विशेषज्ञ स्वास्थ्य सेवा प्रदान गर्ने लक्ष्य लिएको छ। सरकारले केही वर्षअघि प्रत्येक स्थानीय तहमा १५ शैयासम्मको अस्पताल निर्माण गर्ने योजना ल्याएअनुसार २०७८ जेठदेखि यसको निर्माण कार्य सुरु गरिएको थियो।
दुई तले भवन तीन ब्लकमा निर्माण गरिएको छ भने अस्पताल परिसरमा पार्किङ र क्यान्टिनको समेत व्यवस्था गरिएको छ। अस्पतालबाट २४ सै घण्टा आकस्मिक सेवा, बहिरङ्ग तथा अन्तरङ्ग सेवा, शल्यक्रिया कक्ष, गुणस्तरीय प्रयोगशाला, भेन्टिलेटरसहित सर्पदंश उपचार, निःशुल्क शववाहन तथा शव चिस्यान सेवा, रक्तसञ्चार र आँखा उपचार सेवा सञ्चालन गरिनेछ।
उद्घाटन समारोहमा बोल्दै नगरप्रमुख लम्सालले पुरानो भवनबाट सेवा दिँदा देखिएका समस्यालाई समाधान गर्दै नयाँ भवनबाट गुणस्तरीय सेवा प्रदान गरिने बताउनुभयो। साथै विभिन्न स्थानमा रहेका बर्थिङ सेन्टरलाई एम्बुलेन्स सेवा निःशुल्क गर्दै नगर अस्पतालमा एकीकृत गर्ने योजना रहेको उहाँले जानकारी दिनुभयो।
उपप्रमुख बिना भट्टराईले अस्पताललाई व्यवस्थित र स्तरीय बनाउन नगरपालिका निरन्तर लागिरहेको बताउनुभयो। अस्पतालको आम्दानी तथा खर्च नगरपालिकाकै मातहतमा रहने र सुविधा सम्पन्न सेवाबाट नगरवासी लाभान्वित हुने अपेक्षा गरिएको छ।
अस्पताल विकास समितिका अध्यक्ष चिरञ्जीवी योगीका अनुसार अस्पतालमा स्वास्थ्य बिमा गरेका बिरामीलाई समेत सेवा प्रदान भइरहेको छ। हाल तीन जना चिकित्सक कार्यरत रहेको र निकट भविष्यमा एमडीजीपी चिकित्सकसहित सेवा विस्तार गर्ने योजना रहेको उहाँले बताउनुभयो।
हाल ४६ जना जनशक्ति रहेको अस्पतालमा दैनिक करिब २५० जना बिरामीले सेवा लिइरहेका छन्। प्रत्येक शनिबार विशेषज्ञ सेवा उपलब्ध गराउने तयारी गरिएको छ।
अस्पताल व्यवस्थापनका केही काम बाँकी रहे पनि बिरामीलाई सहज पहुँचका लागि निःशुल्क आवतजावतको व्यवस्था गरिएको नगरपालिकाले जनाएको छ।
