काठमाडौं । चर्चित कलाकार, निर्माता तथा समाजसेवी दिपकराज गिरीले थानकोटमा निर्माणाधीन प्रहरी वृत्त भवनका लागि आर्थिक सहयोग गरेका छन् । उनले शुक्रबार एक कार्यक्रममार्फत भवन निर्माण समिति प्रतिनिधिलाई रूपैयाँ ५ लाख हस्तान्तरण गरेका हुन्।
सहयोग हस्तान्तरणपछि गिरीले भने, “समाजले दिएको माया, सम्मान र अवसरलाई जहाँ सकिन्छ त्यहाँ फर्काउने मेरो सानो प्रयास हो । प्रहरी हाम्रो सुरक्षाको प्रमुख आधार भएकाले उनीहरूलाई सुविधा सम्पन्न संरचना उपलब्ध गराउनु हाम्रो दायित्व पनि हो।”
थानकोट प्रहरी वृत्तको नयाँ भवन निर्माणका लागि स्थानीय समुदाय, विभिन्न संघसंस्था र व्यावसायिक क्षेत्रबाट समेत सहयोग संकलन भइरहेको समितिले जनाएको छ। भवन पूरा भएपछि यसले स्थानीय बासिन्दा र यात्रु दुवैलाई सुरक्षा सेवामा थप सहजता र विश्वास दिलाउने अपेक्षा गरिएको छ।
भवन निर्माण समितिले गिरीलाई धन्यवाद ज्ञापन गर्दै उनको योगदानले अन्यलाई पनि समाजसेवामा प्रेरित गर्ने विश्वास व्यक्त गरेको छ।
