नवलपरासी । इसाई समाज नवलपरासी पूर्वका अध्यक्ष भोज बहादुर थनेतले नेकपा (माओवादी केन्द्र) का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’लाई इसाई समुदायसँग सम्बन्धित मागसहित ज्ञापनपत्र बुझाएका छन्।
प्रचण्ड हिजो नवलपरासी पूर्वको थारु समुदायको महान पर्व अनत (अन्हार) को अवसरमा सहभागी हुन पुगेका थिए। कार्यक्रममा इसाई समाजले धार्मिक स्वतन्त्रता र सुविधासम्बन्धी विषयहरू राख्दै विशेषत: इसाई धर्मावलम्बीको लागि चिहान (कब्रिस्तान) को व्यवस्था गर्नुपर्ने तथा भयमुक्त वातावरणमा संगति (सभा/उपासना) गर्न पाउने सुनिश्चितता दिलाउनुपर्ने माग प्रस्तुत गरेको थियो।
ज्ञापनपत्र बुझाइसकेपछि प्रचण्डले मागलाई ध्यानपूर्वक सुनेर सकारात्मक प्रतिक्रिया व्यक्त गरेका छन्। उनले धार्मिक स्वतन्त्रता नेपालको संविधानले सुनिश्चित गरेको अधिकार भएको र व्यवहारमै कार्यान्वयन गर्न आफू प्रयासशील रहने बताएका सहभागीहरूले जानकारी दिए।
यस अवसरमा प्रचण्डले थारु डण्डास्थित थनेत परिवारमा पुगेर भेटघाट पनि गरेका थिए। भोज बहादुर थनेत माओवादी केन्द्रका केन्द्रीय सल्लाहकार समिति सदस्य स्वर्गीय खडक बहादुर थनेतका जेठ छोरा हुन्। खडक बहादुर थनेत प्रचण्डका निकट मित्र समेत रहेका थिए। भेटघाट क्रममा प्रचण्डले थनेत परिवारसँग विगतको मित्रता स्मरण गर्दै पारिवारिक आत्मीयता आदानप्रदान गरेका थिए।
