काठमाडौँको बौद्धस्थित उत्पला क्याफेमा शनिवार “सर्वप्राणी करुणा र शाकाहार प्रवर्द्धन” शीर्षकमा कला प्रदर्शनी र सांगितिक कार्यक्रम सम्पन्न भएको छ। नेपाल एनिमल सेभ संस्थाद्वारा विश्व भिगन दिवसको अवसरमा आयोजित कार्यक्रममा देश–विदेशका पशुप्रेमी, कलाकार, र अहिंसा अभियन्ताहरूको उल्लेखनीय सहभागिता रहेको थियो।
भिगन अर्थात् पूर्ण शाकाहारी जीवनशैलीमा दही–दूध, मासु, माछा मात्र होइन, जनावरका छाला, रौँ, हाड र प्वाँखसमेत प्रयोग नगर्ने अभ्यासलाई जोड दिइन्छ। कार्यक्रम आयोजकमध्येकी शोभा भुजेलका अनुसार, “पशुजन्य उद्योग र उपभोगले जलवायु परिवर्तन र पशु–क्रुरता दुवै बढाइरहेका छन्। यही सन्देश फैलाउनका लागि हामीले यो कार्यक्रम आयोजना गरेका हौँ।”
प्रदर्शनमा ४० भन्दा बढी कलाकारका चित्रकला (पेन्टिङ) प्रदर्शनमा राखिएका थिए, जसले जनावरहरूको पीडा, पर्यावरणीय संकट, र मानवको करुणा–भावनालाई कलामार्फत् चित्रण गरेका थिए। प्रदर्शनीमा राखिएका केही कलाकृति बिक्री समेत गरिएका थिए, जसबाट संकलित रकम प्राणी कल्याणका लागि खर्च गरिने आयोजकहरूले जनाएका छन्।
संगीत, नृत्य, कविता वाचन र शाकाहारी परिकारका स्टलहरूले कार्यक्रमलाई थप आकर्षक बनाएका थिए। लभिङ हार्ट भिगन रेस्टुरेन्ट, द ह्वाइट लोटस भिगन क्याफे र भिगन फुड एन्ड बेभरेज हाउसजस्ता स्थानीय संस्थाहरूले स्वादिष्ट वनस्पतिजन्य भोजनको अनुभव प्रदान गरेका थिए।
कार्यक्रमको विशेष आकर्षण “आर्ट र एक्टिभिजम्” शीर्षकको प्यानल छलफल रहेको थियो। नेपालका प्राणी अधिकार अभियन्ता कृष्ण गुरुङ, नेपाल भिगन ग्यालरीका संस्थापक तथा थाङ्का कलाकार रवि थापा, मल्टीडिसिप्लिनरी आर्टिस्ट अविशमान शाक्य, र अभिनेत्री सरिता राजोपाध्यायजस्ता वक्ताहरूले कला र करुणालाई जोड्ने माध्यमका रूपमा अहिंसाको महत्वबारे विचार व्यक्त गरे।
कार्यक्रममा ‘शाकाहार तर्काधार’ पुस्तकका लेखक रघु आदित्यले शाकाहारको दर्शन र नैतिक जीवनशैलीबारे विशेष प्रस्तुति दिएका थिए। उनले भने, “सत्य र अहिंसाको पक्षमा बोलिरहनु मानवीय दायित्व हो—यही बाटोले समाजमा करुणा फैलाउँछ।”
आयोजक दिपेश श्रेष्ठका अनुसार, कार्यक्रमको उद्देश्य गैरमानव प्राणीको पीडा र आवाजलाई कला र संगीतमार्फत् समाजमाझ पुर्याउने हो। तीन वर्षदेखि सक्रिय नेपाल भिगन ग्यालरीले कला र सहानुभूतिलाई जोड्दै शोषणमुक्त विश्वको कल्पनालाई सशक्तरूपमा अघि बढाइरहेको उनले बताए।
कार्यक्रमलाई उत्पला क्याफे र थ्राइभ फिलान्थ्रोपीले सहयोग गरेका थिए।
