जनकपुर । जनमत पार्टीले मधेश प्रदेशलाई स्वायत्त प्रदेश घोषणा गर्न माग गर्दै आन्दोलनको घोषणा गरेको छ। पार्टीले शुक्रबारदेखि विभिन्न जिल्लामा सडक प्रदर्शन, नाराबाजी र धर्ना कार्यक्रम सुरु गरेको हो।
पार्टीका नेता–कार्यकर्ताहरूले “मधेश प्रदेशलाई स्वायत्त प्रदेश घोषणा गर”, “प्रहरी र कर्मचारी पूर्णतः प्रदेश मातहत कायम गर”, “संघको CDO/SP फिर्ता ले, दमन–शोषण बन्द गर”, “संघको हस्तक्षेप बन्द गर”, “जनमत पार्टी जिन्दावाद, जय जनमत जय स्वराज” जस्ता नारासहित जुलुस निकालेका छन्।
आन्दोलनले मधेश प्रदेशका विभिन्न जिल्लाहरूमा प्रभाव पारेको छ। स्थानीय प्रशासनले स्थिति नियन्त्रणमा राख्न सुरक्षाकर्मीको उपस्थिति बढाएको छ।
केही दिनअघि जनमत पार्टीका अध्यक्ष डा. सिके राउतले सामाजिक सञ्जालमार्फत स्वायत्त मधेश प्रदेशको माग सार्वजनिक गर्दै, संघीय सरकारको हस्तक्षेप समाप्त गर्नुपर्ने र प्रदेशलाई पूर्ण अधिकार दिनुपर्ने धारणा व्यक्त गर्नुभएको थियो।
पार्टीका अनुसार आन्दोलन अहिलेलाई शान्तिपूर्ण ढंगले अघि बढाइने बताइएको छ। तर माग पूरा नभए थप आन्दोलनका कार्यक्रम घोषणा गरिने चेतावनी दिइएको छ।
