काठमाडौँ । प्रधानमन्त्री सुशीला कार्कीसँग आज थारू कल्याणकारिणी सभाको एक प्रतिनिधिमण्डलले प्रधानमन्त्री निवास बालुवाटारमा भेटघाट गरेको छ। भेटका क्रममा प्रतिनिधिमण्डलले प्रधानमन्त्री कार्कीलाई थारू राष्ट्रिय माघी (खिचरी, खिचडी, तिलासक्राइत, माघ) महोत्सवमा उपस्थितिका लागि औपचारिक निम्तो दिएको हो।
मूल आयोजक समितिका संयोजक तथा थारू कल्याणकारिणी सभाका अध्यक्ष प्रेमीलाल चौधरीले माघ १ गते काठमाडौँको टुँडिखेलमा आयोजना हुने थारू राष्ट्रिय माघी (खिचरी, खिचडी, तिलासक्राइत, माघ) महोत्सवको निमन्त्रणापत्र प्रधानमन्त्री कार्कीलाई हस्तान्तरण गरे।
सो अवसरमा अध्यक्ष चौधरीले थारू समुदायका दीर्घकालीन माग तथा मुद्दाप्रति सरकारको गम्भीर ध्यानाकर्षण गराउँदै संविधान जारी भएको करिब एक दशक बितिसक्दा पनि निजामती सेवामा थारू समुदायको आरक्षण सुनिश्चित हुन नसकेको गुनासो व्यक्त गरे। उनले राज्यका निकायहरूमा थारू समुदायको समावेशी र समान प्रतिनिधित्व सुनिश्चित गर्न ठोस पहल आवश्यक रहेको बताए।
जवाफमा प्रधानमन्त्री कार्कीले संविधान र कानुनमा सुनिश्चित भइसकेका हक अधिकारको प्रयोग कसैले रोक्न नहुने स्पष्ट धारणा राखिन्। उनले भनिन्, “संविधानले दिएको अधिकार कसले र किन रोकेको छ भन्ने कुरा मैले पनि बुझ्न सकिरहेकी छैन। म यसप्रति चिन्तित छु। संविधान र कानुनमा व्यवस्थित भइसकेका हकको प्रचलन कसैले रोक्न हुँदैन।”
प्रधानमन्त्री कार्कीले नेपाल सबै समुदायको साझा फूलबारी भएकाले राज्यका सबै संरचनामा सबै समुदायको उचित प्रतिनिधित्व अनिवार्य रहेको उल्लेख गरिन्। सबै समुदायको सहभागिताबाट मात्र समावेशी र दिगो विकास सम्भव हुने उनको भनाइ थियो।
थारू समुदायले प्रत्येक वर्ष माघे संक्रान्तिका दिन आफ्नो प्रमुख सांस्कृतिक पर्व माघी (खिचरी, खिचडी, तिलासक्राइत, माघ) उत्सवका रूपमा मनाउँदै आएको छ। यसै अवसरमा आयोजना हुने थारू राष्ट्रिय माघी महोत्सव नेपालमै मात्र सीमित नरही विश्वव्यापी रूपमा मनाउने तयारी गरिएको आयोजकले जनाएको छ।
आयोजकका अनुसार बेलायत, पोर्तुगल, अस्ट्रेलिया, संयुक्त अरब इमिरेट्स (युएई), मलेसिया, भारत र जापानलगायत विश्वका विभिन्न देशहरूमा थारू समुदायको सक्रिय सहभागितामा माघी विशेष सांस्कृतिक कार्यक्रम आयोजना गरिँदैछ। ती सबै कार्यक्रमका लागि अनलाइन मिडिया पार्टनरका रूपमा EasyKhabar लाई समावेश गरिएको छ।
माघी पर्व थारू समुदायको सांस्कृतिक पहिचान, सामाजिक एकता र ऐतिहासिक परम्परासँग गहिरो रूपमा जोडिएको पर्व मानिन्छ।
