काठमाडौँ । निर्वाचन आयोग, नेपालले प्रतिनिधि सभा सदस्य निर्वाचन–२०८२ अन्तर्गत समानुपातिक निर्वाचन प्रणालीमा बन्दसूचीमा नाम समावेश भएका उम्मेदवारहरूले आफ्नो नाम फिर्ता लिन सक्ने सम्बन्धमा औपचारिक सूचना जारी गरेको छ।
आयोगले २०८२ साल फागुन २९ गते सम्पन्न प्रतिनिधि सभा सदस्य निर्वाचनमा राजनीतिक दलहरूले पेश गरेको बन्दसूचीमा नाम समावेश भएका उम्मेदवारहरूका लागि नाम फिर्ता लिने प्रक्रिया खुला गरिएको जनाएको छ। निर्वाचन आयोगबाट स्वीकृत निर्वाचन कार्यक्रमअनुसार सम्बन्धित उम्मेदवारले तोकिएको मिति, समय र स्थानमा उपस्थित भई उम्मेदवारी फिर्ता लिन सक्नेछन्।
सूचनामा उल्लेख भएअनुसार प्रतिनिधि सभा सदस्य समानुपातिक निर्वाचन निर्देशिका–२०८२ को अनुसूची १५ बमोजिम उम्मेदवारी फिर्ताका लागि निवेदन दिन सकिने व्यवस्था छ। कुनै कारणवश उम्मेदवार स्वयं उपस्थित हुन नसक्ने अवस्थामा कानुनबमोजिम वारेसमार्फत समेत नाम फिर्ता लिन सकिने व्यवस्था गरिएको आयोगले स्पष्ट पारेको छ।
निर्वाचन आयोगले बन्दसूचीमा नाम समावेश भएका सबै सम्बन्धित उम्मेदवारहरूलाई तोकिएको समयसीमाभित्र आवश्यक प्रक्रिया पूरा गर्न आग्रह गरेको छ। आयोगका अनुसार निर्धारित म्यादपछि नाम फिर्ता लिन नपाइने भएकाले समयमै उपस्थित भई प्रक्रिया पूरा गर्न अनुरोध गरिएको छ।
उक्त सूचना निर्वाचन अधिकृत कृष्ण बहादुर रावतद्वारा जारी गरिएको हो।
