प्युठान । प्रगतिशील लोकतान्त्रिक पार्टीका तर्फबाट प्युठान–१ प्रतिनिधि सभा निर्वाचनका लागि श्यामलाल गहताजले उम्मेदवारी मनोनयन दर्ता गराएका छन्।
निर्वाचन अधिकृतको कार्यालयमा पुगेर गहताजले आफ्नो उम्मेदवारी दर्ता गराएका हुन्। उनको निर्वाचन चिन्ह “आँखा” रहेको छ।
उम्मेदवारी मनोनयनपछि सञ्चारकर्मीहरूसँग कुरा गर्दै गहताजले जनताको हक–अधिकार सुनिश्चित गर्ने, सुशासन कायम गर्ने तथा सामाजिक न्याय र समावेशी विकासलाई प्राथमिकतामा राखेर काम गर्ने प्रतिबद्धता जनाए। उनले प्युठान जिल्लाको समग्र विकास, रोजगारी सिर्जना, शिक्षा, स्वास्थ्य र युवामैत्री नीति आफ्नो प्रमुख एजेन्डा रहने बताए।
प्रगतिशील लोकतान्त्रिक पार्टीले गहताजलाई जनतासँग नजिक रहेको, स्वच्छ छवि र विकासप्रति प्रतिबद्ध उम्मेदवारका रूपमा अघि सारेको जनाएको छ।
प्रतिनिधि सभाको निर्वाचन आगामी फाल्गुन २१ गते हुने निर्वाचन आयोगले जनाएको छ। निर्वाचनको मिति नजिकिँदै जाँदा प्युठान–१ मा चुनावी गतिविधि र प्रतिस्पर्धा तीव्र बन्दै गएको छ।
