काठमाडौं । सर्वोच्च अदालतले गत आर्थिक वर्षमा उल्लेखनीय रूपमा मुद्दा फर्छ्यौट गरेको जनाएको छ। अदालतका अनुसार आव २०८१/०८२ मा कुल ४० हजार ७४१ मुद्दामध्ये १६ हजार ६३४ अर्थात् ४० दशमलव ८२ प्रतिशत मुद्दा फर्छ्यौट भएका छन्।
अघिल्लो आर्थिक वर्षबाट जिम्मेवारी सरेका २५ हजार ७२८ मुद्दा तथा गत वर्ष नयाँ दर्ता भएका १५ हजार १३ मुद्दा गरी उक्त सङ्ख्या पुगेको हो। सर्वोच्च अदालतका प्रवक्ता अर्जुनप्रसाद कोइरालाका अनुसार यो अघिल्लो वर्षको तुलनामा ६ दशमलव ६९ प्रतिशतले बढी फर्छ्यौट हो।
आज राष्ट्रपति रामचन्द्र पौडेलसमक्ष प्रधानन्यायाधीश प्रकाशमानसिंह राउतले वार्षिक प्रतिवेदन पेश गरेका छन्।
प्रतिवेदनअनुसार उच्च अदालतहरूमा कुल ८३ हजार ४१० मुद्दा रहेकामा ६१ हजार ४५४ अर्थात् ७३ दशमलव ६७ प्रतिशत फर्छ्यौट भएको छ। यो दर गत वर्षको तुलनामा ८ दशमलव ८५ प्रतिशतले बढी हो।
त्यस्तै, जिल्ला अदालतहरूमा कुल २ लाख ६८ हजार ४४ मुद्दामध्ये १ लाख ६६ हजार ४६७ अर्थात् ६२ दशमलव १० प्रतिशत मुद्दा फर्छ्यौट भएका छन्। यो पनि अघिल्लो वर्षको तुलनामा ८ दशमलव ९० प्रतिशतले वृद्धि भएको प्रतिवेदनमा उल्लेख छ।
समग्रमा सर्वोच्च, उच्च र जिल्ला अदालत तथा न्यायाधिकरणमा अघिल्लो वर्षबाट १ लाख ६२ हजार ३४४ मुद्दा सरेका थिए भने गत वर्ष २ लाख ३४ हजार २५३ नयाँ मुद्दा दर्ता भएका थिए। यसरी कुल ३ लाख ९६ हजार ५९३ मुद्दामध्ये २ लाख ४७ हजार ३३ अर्थात् ६२ दशमलव २९ प्रतिशत मुद्दा फर्छ्यौट भएका छन् भने १ लाख ४९ हजार ५६० मुद्दा अझै बाँकी रहेका छन्।
