काठमाडौं । प्रधानमन्त्री कार्यालयले कानुनविपरीत प्रयोग भइरहेका ६२२ वटा सरकारी सवारी साधन फिर्ता ल्याएको जनाएको छ। प्रशासनिक बेथिति अन्त्य गर्ने उद्देश्यले उक्त कदम चालिएको प्रधानमन्त्री कार्यालयले स्पष्ट पारेको छ।
कार्यालयका अनुसार विभिन्न निकाय तथा पदाधिकारीले नियमविपरीत प्रयोग गरिरहेका सवारी साधनहरूको विवरण संकलन गरी फिर्ता ल्याउने प्रक्रिया अघि बढाइएको थियो। सोही अभियानअन्तर्गत हालसम्म ६२२ वटा सवारी साधन सरकारी नियन्त्रणमा ल्याइएको हो।
प्रधानमन्त्री कार्यालयले सार्वजनिक सम्पत्तिको दुरुपयोग रोक्न र पारदर्शिता कायम गर्न यस प्रकारको निगरानी र कारबाहीलाई अझ सशक्त बनाउने जनाएको छ। साथै, भविष्यमा यस्ता गतिविधि दोहोरिन नदिन कडा निर्देशनसमेत जारी गरिएको छ।
यस कदमलाई प्रशासनिक सुधारतर्फको महत्वपूर्ण पहलका रूपमा हेरिएको छ। केही सरोकारवालाले भने यसले सरकारी स्रोत साधनको सही व्यवस्थापनमा टेवा पुग्ने विश्वास व्यक्त गरेका छन्।
