लन्डन । बेलायतमा क्रियाशील थारु समुदायको साझा संस्था थारु कल्याणकारिणी सभा युके ले दोस्रो पटक भव्य रूपमा थारु माघी महोत्सव आयोजना गर्ने भएको छ। थारु समुदायको मौलिक संस्कृति, परम्परा र पहिचान प्रवर्द्धन गर्ने उद्देश्यसहित आयोजना गर्न लागिएको यो महोत्सव बुधबार, जनवरी १४, २०२६ मा लन्डनस्थित Hotel Hilton Garden Inn Heathrow मा सम्पन्न हुनेछ।
आयोजकका अनुसार महोत्सवमा थारु समुदायको प्रमुख पर्व माघी (खिचरी, तिला सक्राइत, खिचडी, खिचरा, माघ) को सांस्कृतिक महत्वलाई उजागर गरिनेछ। कार्यक्रममा थारु परम्परागत खानाका परिकार, मौलिक नृत्य, सांगीतिक प्रस्तुति तथा विविध सांस्कृतिक कार्यक्रमहरू प्रस्तुत गरिने छन्।
महोत्सवमा बेलायतका विभिन्न सहरहरूबाट थारु समुदायका साथै अन्य नेपाली समुदायको उल्लेखनीय सहभागिता रहने अपेक्षा गरिएको छ। आयोजकले परदेशी जीवनमा रहेका थारु समुदायलाई आफ्नो संस्कृति, भाषा र परम्परासँग जोड्ने तथा नयाँ पुस्तामा सांस्कृतिक चेतना विकास गर्ने लक्ष्य रहेको बताएका छन्।
महोत्सवमा सहभागी हुन इच्छुक व्यक्तिहरूका लागि प्रवेश टिकट ३० पाउण्ड निर्धारण गरिएको छ। बिहान १२ बजेदेखि राति १० बजेसम्म चल्ने कार्यक्रममा पारिवारिक तथा सांस्कृतिक वातावरणमा माघी पर्व मनाइनेछ।
कार्यक्रमको मिडिया पार्टनरका रूपमा एक्सेस मिडिया प्रा.लि. ले संचालन गरेको www.easykhabar.com रहनेछ, जसले महोत्सवसम्बन्धी समाचार, तस्बिर तथा भिडियो सामग्रीलाई व्यापक रूपमा प्रचार–प्रसार गर्नेछ।
थारु कल्याणकारिणी सभा युकेले सम्पूर्ण नेपाली समुदायलाई कार्यक्रममा उपस्थित भई थारु संस्कृति र पहिचानको उत्सवमा सहभागी हुन हार्दिक निमन्त्रणा गरेको छ।
