युनाइटेड अरब इमिरेट्स (यूएई) मा क्रियाशील थारु कल्याणकारिणी सभा यु.ए.ई. ले थारु समुदायको मौलिक कला, संस्कृति र पहिचानको संरक्षण तथा प्रवर्द्धन गर्ने उद्देश्यसहित १२औँ वार्षिक माघी पर्व (खिचरी, खिचडी, खिचरा, तिला सङ्क्राइत, माघ) तथा थारु नयाँ वर्ष २६४९ विशेष कार्यक्रम आयोजना गर्ने भएको छ।
आगामी आइतबार, ११ जनवरी २०२६ का दिन दुबईस्थित क्लब एभरेष्ट, एस्टोरिया होटल मा आयोजना हुने कार्यक्रममा नेपालबाट आमन्त्रित चर्चित कलाकारहरू तथा यूएईमा रहेका स्थानीय थारु कलाकारहरूको संयुक्त प्रस्तुति रहने आयोजकले जनाएको छ।
अतिथि कलाकार खेम चौधरी र युएईमा कार्यरत उद्घघोषक तथा गायक केशब राज महतोको प्रस्तुति रहनेछ, साथै थारु समुदायका परम्परागत नृत्य, सांगीतिक प्रस्तुति, माघी संस्कृतिसँग सम्बन्धित झाँकी, तथा मौलिक थारु खानाका परिकारहरू (खिचरी, खिचरा, माछा लगायत) प्रस्तुत गरिनेछ।
“थारु कला संस्कृति हाम्रो पहिचान, यसलाई संरक्षण र प्रवर्द्धन गर्ने हाम्रो अभियान” भन्ने मूल नारासहित आयोजना हुने कार्यक्रममा यूएईमा रहेका विभिन्न संघ–संस्था, बुद्धिजीवी, युवाहरू तथा नेपाली समुदायको उल्लेखनीय सहभागिता रहने अपेक्षा गरिएको छ।
कार्यक्रम अपराह्न १२ बजेदेखि सुरु हुने आयोजकले जानकारी दिएको छ। यस कार्यक्रमको मिडिया पार्टनर www.easykhabar.com, रहेको छ भने मलाया खबर, खालापुर न्यूज, थारुवान, जनचर्चा लगायतका सञ्चारमाध्यमहरू मिडिया पार्टनरका रूपमा रहेका छन्।
आयोजक संस्थाले यूएईमा रहेका सम्पूर्ण थारु समुदाय तथा नेपाली दाजुभाइ दिदीबहिनीहरूलाई कार्यक्रममा सहभागी भई माघी पर्वको उल्लास सँगै मनाउन हार्दिक निमन्त्रणा गरेको छ।
