लन्डन । बेलायतमा क्रियाशील थारु समुदायको साझा संस्था थारु कल्याणकारिणी सभा युके ले दोस्रो पटक भव्य रूपमा थारु माघी (खिचरी, तिला सक्राइत, खिचडी, खिचरा, माघ) महोत्सव आयोजना गर्ने भएको छ। थारु समुदायको मौलिक संस्कृति, परम्परा र पहिचान प्रवर्द्धन गर्ने उद्देश्यसहित आयोजना गर्न लागिएको यो महोत्सव बुधबार, जनवरी १४, २०२६ मा लन्डनस्थित Hotel Hilton Garden Inn Heathrow मा सम्पन्न हुनेछ।
कार्यक्रममा बेलायतस्थित नेपाली दूतावासका कार्यवाहक राजदूत विपिन दुवाडी प्रमुख अतिथिका रूपमा सहभागी हुने जनाइएको छ। त्यसैगरी, आदिवासी जनजाति महासंघ युकेको अध्यक्ष मेजर (से.नि.) योगेश राई विशिष्ट अतिथिका रूपमा सहभागी हुनेछन्। साथै, बेलायतस्थित विभिन्न संघ–संस्था, सामाजिक अभियन्ता तथा बुद्धिजीवी व्यक्तित्वहरूको समेत उपस्थिति रहने आयोजकले जानकारी दिएका छन्।
महोत्सवमा सहभागी हुन इच्छुक व्यक्तिहरूका लागि प्रवेश टिकट ३० पाउण्ड निर्धारण गरिएको छ। दिउँसो १ बजेदेखि राति १० बजेसम्म चल्ने कार्यक्रममा पारिवारिक तथा सांस्कृतिक वातावरणमा माघी पर्व मनाइनेछ।
कार्यक्रमको मिडिया पार्टनरका रूपमा www.easykhabar.com रहनेछ, जसले महोत्सवसम्बन्धी समाचार, तस्बिर तथा भिडियो सामग्रीलाई व्यापक रूपमा प्रचार–प्रसार गर्नेछ।
थारु कल्याणकारिणी सभा युकेले सम्पूर्ण नेपाली समुदायलाई कार्यक्रममा उपस्थित भई थारु संस्कृति र पहिचानको उत्सवमा सहभागी हुन हार्दिक निमन्त्रणा गरेको छ।
