काठमाडौँ । सरकारले आगामी फागुन १ देखि ७ गतेसम्म कर्णाली प्रदेशमा १० औँ राष्ट्रिय खेलकुद प्रतियोगिता आयोजना गर्ने निर्णय गरेको छ। यो निर्णय कात्तिक २४ गते बसेको मन्त्रीपरिषद् बैठकले गरेको हो।
सरकारका प्रवक्ता तथा सञ्चार तथा सूचना प्रविधिमन्त्री जगदीश खरेलले मङ्गलबार मन्त्रीपरिषद्का निर्णयहरू सार्वजनिक गर्दै उक्त जानकारी दिनुभयो।
मन्त्रीपरिषद्ले साथै स्वास्थ्य तथा जनसङ्ख्या मन्त्रालय अन्तर्गतका विभिन्न निकायमा २५६ जना अस्थायी दरबन्दी स्वीकृत गर्ने निर्णय पनि गरेको छ। स्वीकृत दरबन्दीहरू कान्ति बाल अस्पताल (महाराजगन्ज, काठमाडौँ), स्वास्थ्य बीमा बोर्ड (काठमाडौँ), गेटा अस्पताल (धनगढी), सुशील कोइराला प्रखर क्यान्सर अस्पताल (खजुरा, बाँके) र डडेलधुरा अस्पताल (डडेलधुरा) का लागि हुन्। यी दरबन्दीहरू आर्थिक वर्ष २०८२/८३ का लागि स्वीकृत गरिएका हुन्।
त्यसैगरी, बैठकले एमसिए–नेपालद्वारा निर्माण हुने ४०० केभी प्रसारण लाइनको मध्यरेखाबाट दायाँ र बायाँ २३/२३ मिटर भित्र पर्ने करिब १,३८१ हेक्टर क्षेत्रफलका जग्गामा संरचना निर्माण र रुख रोप्न निषेध गर्ने निर्णय गरेको छ।
साथै, बैठकले ‘राष्ट्रिय परिचयपत्र तथा व्यक्तिगत घटना दर्ता नियमावली (दोस्रो संशोधन), २०८२’ स्वीकृत गर्ने निर्णय पनि गरेको सञ्चारमन्त्री खरेलले जानकारी दिनुभयो।
