जनकपुरधाम । धार्मिक, सांस्कृतिक तथा पुरातात्त्विक महत्व बोकेको जनकपुरधामलाई संरक्षित क्षेत्रका रूपमा विकास गर्ने अभियान औपचारिक रूपमा सुरु भएको छ। ७२ कुण्ड र ५२ कुटीको सहरका रूपमा परिचित जनकपुरधामको संरक्षण र संवर्द्धन गर्ने उद्देश्यसहित जानकी मन्दिर आसपासको क्षेत्रलाई ‘संरक्षित क्षेत्र’ घोषणा गर्ने तथा जानकी मन्दिरलाई विश्व सम्पदा सूचीमा सूचीकृत गराउने प्रक्रिया अघि बढाइएको हो।
यसै सन्दर्भमा वैशाख २१ गते जनकपुरधाम उपमहानगरपालिकाको सभा हलमा आयोजित कार्यशाला बैठकमा राष्ट्रिय स्वतन्त्र पार्टीका प्रवक्ता एवं संघीय सांसद मनिष झाको उपस्थिति रहेको थियो। कार्यक्रममा विभिन्न सरोकारवाला निकाय, विज्ञ तथा स्थानीय प्रतिनिधिहरूको सहभागिता रहेको थियो।
बैठकमा जनकपुरधामको मौलिक पहिचान जोगाउँदै दीर्घकालीन संरक्षण योजना आवश्यक रहेकोमा जोड दिइएको थियो। सहभागीहरूले सांस्कृतिक सम्पदाको संरक्षणसँगै पर्यटन प्रवर्द्धनमा समेत टेवा पुग्ने विश्वास व्यक्त गरेका थिए।
उक्त पहलले जनकपुरधामको ऐतिहासिक तथा धार्मिक महत्वलाई राष्ट्रिय र अन्तर्राष्ट्रिय स्तरमा स्थापित गर्न महत्वपूर्ण भूमिका खेल्ने अपेक्षा गरिएको छ।
